Educaçom para o bom viver

Biodanza aposta polo florescimento das potencialidades humanas e o fomento dum novo paradigma sociocultural baseado num princípio chave: a vida no centro. Por isso podemos considerá-la umha pedagogia do bom viver.

O Bom Viver abriga as cosmovisons de povos originários de Abya Yala (termo empregado polo povo kuna para designar o que hoje se conhece como continente americano) e outros territórios. Comunidades que se caraterizam por manter umha relaçom de equilíbrio e interdependência.

Constitui umha alternativa civilizatória ao modelo socioeconómico e cultural capitalista-colonial-patriarcal, assentado na desigualdade, no produtivismo, no consumismo, no espólio e na exploraçom dos seres humanos e da natureza. O Bom Viver convida-nos a sonhar e a construir outros mundos partindo da centralidade da vida e da diversidade como um valor que honrar e proteger.

“O Bem Viver não é um simples conceito. É uma vivência.”

Alberto Acosta (*)

Em sintonia com esses valores, desenvolvemos propostas pedagógicas baseadas na educaçom popular, na educaçom biocêntrica e nas pedagogias feministas para a emancipaçom pessoal e coletiva, a transformaçom social e o desenvolvimento de potenciais orientados à convivência, à justiça social, à felicidade humana, à harmonia e ao cuidado da vida como princípio ético.

A educaçom popular abrange um conjunto de saberes e práticas pedagógicas dirigidas à emancipaçom e a superar as desigualdades e opressons baseando-se na construçom do conhecimento a partir da própria experiência.

As pedagogias feministas bebem da educaçom popular para construir práticas que rachem com as opressons patriarcais e que abram caminho a outras formas de estar e de viver desde a liberdade, a autonomia e a equidade.

A educaçom biocêntrica propom um paradigma centrado na relaçom com a vida e na inserçom da afetividade no processo de ensino-aprendizagem, valorizando a inteligência afetiva, as sensaçons corporais, a expressom e a criatividade, o contato e o valor cenestésico do movimento.

Com as nossas propostas pedagógicas buscamos mudar o argumento de vida pessoal e coletivo através da vivência e da interaçom em grupo, iluminando as potencialidades e dons que cada quem trae de seu.

(*) O Bem Viver. Uma oportunidade para imaginar outros mundos (2016). Elefante Editora.