Por que fazer o que fazemos?
Som muitas as pessoas que se sentem submergidas num estilo de vida estressante, acelerado, com altos níveis de exigência e rendimento. Marcado polo individualismo e pola desconexom com o corpo e as emoçons.
Isso tem um claro impacto na saúde física, psíquica e social. Cada vez som mais frequentes as doenças psicossomáticas e autoimunes. Também os quadros de ansiedade, angústia, mal-estar generalizado, sensaçom de vazio existencial, desorientaçom, falta de motivaçom ou insegurança.
No plano relacional e social observamos um empobrecimento dos vínculos , o esfarelamento da trama comunitária e deterioro das relaçons de cooperaçom e solidariedade. Tudo isso enquadrado em um marco sociocultural do maltrato, de relaçons de poder e dominaçom que provocam situaçons de desigualdade, injustiça e destruiçom da natureza nom humana (porque nós também somos natureza!).
Ao desenvolver o Sistema Biodanza, Rolando Toro afirmava tratar-se de umha ferramenta dirigida a acompanhar a pessoas “enfermas de civilizaçom”, ou seja, todas/todes/todos nós.
E entom, que buscamos com este projeto?
Biodanza Cheia de Vida nasce com a vontade de contribuir a espalhar sementes de saúde e bons viveres que revertam esse quadro. Persegue a transformaçom pessoal e social e o faz através do afeto e do fomento da cultura e valores biocêntricos.
Um projeto criado para coadjuvar com outras estratégias de promoçom da saúde e bem-estar que facilitem desenvolver um estilo de vida mais sadio, harmônico e pleno.
Entendemos a educaçom e a promoçom da saúde como vetores para a transformaçom pessoal e social, umha vez que fomentam a adquisiçom de hábitos saudáveis, a mudança de estilo de vida e a construçom do comum, dos valores comunitários.
“Biodanza conduze-nos à arte de viver“, dizia Rolando Toro enquanto dançava.
Atuamos para reforçar tudo aquilo que nutre, fortalece, ilumina e dá vitalidade, colocando o foco nas necessidades (nom só) humanas e nos cuidados. Naquilo que sustenta à vida cada dia.
Como o fazemos?
Fazêmo-lo através de sessons regulares ou monográficas, bem como de obradoiros temáticos desenhados à medida para instituçons, organizaçons e coletivos nos que empregamos a Biodanza e a educaçom para o bom viver para trabalhar diferentes temas. O ano passado também desenvolvemos um espaço virtual de cuidado comunitário da saúde.
Destacamos os obradoiros para a promoçom da saúde com perspectiva de gênero e os obradoiros para mulheres em situaçons de violência ou acolhidas em programas de proteçom internacional. Iniciativas que levamos à cabo em colaboraçom com Centros de Informaçom às Mulheres ou entidades especializadas.
Oferecemos espaços de nutriçom e cuidado da saúde integral, tanto pessoal, organizacional como comunitária, que favorecem o bem-estar e o florescimento das potencialidades para viver de forma mais plena e integrada.